Okkara Stuðlar

Streymkort og streymtalvur
Streymkortini í HÚK-skipanini eru grundaði á teldusimuleringar, sum eru gjørdar á Fróðskaparsetrinum, meðan streymtalvurnar er roknaðar út frá eina streymmáting, sum Fiskirannsóknarstovan gjørdi á Munkagrunninum í 1981. Í seinastu útgávuni av HÚK-skipanini eru bert smáar ábøtur gjørdar

Streymkortini
Streymkortini í HÚK-skipanini byggja á úrslit frá streymsimuleringum, sum Náttúruvísindadeildin á Fróðskaparsetrinum framdi fyri nøkrum árum síðani. Framgangsmátin í útrokningunum er, at eitt net verður lagt yvir økið, og síðani verðar nakrar støddfrøðiligar frymlar ásettir í hvørjum einstøkum knútapunktið í netinum. Í øllum knútapunktum er dýpi eisini kent, og er rætt dýpi avgerandi fyri at úrslitini skulu verða á einari leið. Fjarðstøðan millum roknipunktini er 100 m, og um væl vil til, so burdi ráki verið á einari leið innanfyri umleið 5 ferðir hesa fjarðastøðuna, t.v.s. innan fyri 500 m. Hetta ger, at nær við landi, og har knappligar broytingar eru í botninum, má streymurin takast við størsta fyrivarni.

Bert miðalstreymur
Streymurin, sum er á kortunum, er fyri miðalstreym. Eingin munur er á kortunum um streymtalvan vísir harðan ellan spakan streym, og mugu brúkaranir sjálvir meta um hetta út frá egnum royndum og streymtalvunum. Í skipanini eru 48 kort, sum vísa streymin fyri hvørjar gott 15 minuttir yvir eitt tíðarskeið upp 12 tímar og 26 minuttir. Skipanin finnur røttu kortini í mun til eina klokkutíð, sum brúkarin ásetir, ella beinleiðis frá telduni ella GPS-arinum, um hann er tilkoblaður.

Streymkurvar
Í skipanini eru streymkurvar, sum byggja á eina streymmáting, ið Fiskirannsóknarstovan framdi á Munkagrunninum í tíðarskeiðinum 09.02 - 25.07 í 1981. Útrokningar hevur Náttúruvísindadeildin á Fróðskaparasetrinum gjørt, og í hesari útgávuni røkka tær bert fyri ár 2009. Ætlanin er at leggja fleiri ár aftrat í næstu uppstigan av skipanini.

Streymkort við á bátinum
Tað er lagt upp til, at skipanin skal kunna takast við umborð, tá farið verður á flot, men minsta kravið er, at tað er møguligt at hava eina teldu við umborð. Har hetta ikki er møguligt, ber til at prenta neyðug kort út á pappír aðrenn farið verður heimanifrá. Til hetta endamálið hava vit lagt nøkur kort til rættis til prentingar, sum eru tøk umvegis knøttin "Streymkort at prenta út".

Menning av skipanini
Tað er ein áhugabólkur, hvørs limir eru nevndir aðrastaðni, sum hevur staðið fyri menningini av HÚK-skipanini í góðum samstarvi við KT-fyritøkuna Formula.fo, sum hevur tøkniliga ment og forritað skipanina.

Heintan av skipanini
Skipanin kann heintast niður umvegis slóðini á forsíðuni. Tíanverri fyllir hon nakað nógv, heili 163 Mb, so tað umræður at verða tolin. Men hetta skal bert gerast eina ferð, meðan uppstiganir og onnur iskoytir, sum eftir ætlan koma so hvørt tey eru klár, fara at fylla munandi minni.

Skeivleikar
Vit vilja fegnir frætta hvussu skipanin roynist. Serliga áhugaðir eru vit at hoyra um skeivleikar. Hetta er ein stór hjálp hjá okkum fyri at gera næstu útgávuna betri og rættari.